في حب أم الدنيا
مصـــــــــر
ولشباب مصر الذين ضحوا بأرواحهم
من أجل عزة وكرامة هذا الوطن الغالي
أحضنينــا يا مصــر
أحضنينا يا مصر يا أمي أحضنينا
بـ لهفه وحب وشوق في حضنك دوبينا وأوعي تسبينا
ثلاثين سنه فساد وسرقة وخيانه واليوم لابد نبدأ وتعوضينا
من قنالك يا أمي نفسي نشرب ونرتوي . يالا تعالي أروينا
وبقوارب الهيئه نوري للسفن ونوري شواطئ القناة وأسعدينا
ده خيرك يا أمي ثلاثين سنه عمره ماكان في يوم لينا
....
يالا يا جوامع أرفعي الأذان علشان نصلي
يالا ياكنائس رن أجراسك علشان نهني
تعالوا كلنا نمسك في أيد بعض نرقص نغني
الثورة نجحت وشبابك يا مصر يا أمي
حققوا الصعب بعد ما كان تمني
....
بس في عتاب بسيط عندي ليكِ يا غاليه
يا أمي غاز بلادي أخدوه الصهاينه
و بالرخيص راحلهم وبقى غالي علينا متكفهوش المهيه
الصهاينه نورو بيه بيوتهم وضلموها على أخوات ليه
في فلسطين في أرض غزة هي دي القضيه
الغاز ده مش لقيه . ده من أرض العروبه ديه
بالزمه يا أمي ده مش حرام يا غاليه
....
ده حقي يا أمي وحق أخواتي ليه بالرخيص باعوه
ليه يخدوه الصهاينه وأبنك الفقير يحرموه
ده أنا كان نفسي غازكِ ما يبعدش عن إيدينا
كان نفسي في كل بيت يتوجد
ليه يا أمي من خيرك تحرمينا
....
وأرضك يا أمي اللي بوروها ومحبوش كمان يزرعوها
كل ده علشان يجوعونا
وبـ فيلا وقصر ليهم عليها راحو يبنوها ويسكنوها
وأحنا ولا على بالهم نسونا
واللي تنفع تتزرع للغريب باعوها
بـ أقل من ثمنها ونهابوكِ ونهابونا
....
النهاردة يا أمي هـ نزرع في أرضكِ القمح
مش هـ نستنا منحه أمريكاني
مش هـ نستنا نمد أيدينا نشحت الرغيف
في يوم جديد جاي تاني
وكمان هـ نزرع القطن و ولادك هـ تكسيهم
ونبني المصانع عشان تنتج وتشغل أولادك
هو ده خيرك خلاص ما بقاش فيكِ يا أمي أناني
....
يا أمي حرامية الحزب الوطني في زمانهم شَحتونا
وكشفو لحم ولادكِ وجوعونا
النهارده آن الآوان خيرك يا أمي يعود من تاني لأولادكِ وأحفادكِ
كفاية هوان وأستعباد دول ياما داسونا
وباعونا وناسونا ودنسونا
....
خلاص يا أمي أدفني ولا أحرقي الدستور المزور القديم
أدفني ولا أحرقي دفاتر الظلم والعبوديه والخيانه وصور الخاينين
وأرجعي لأولادك اللي قامو بالثورة في يناير يوم خمسة وعشرين
هما دول معدنك دول المعدن الأصيل اللي ما يتبعش ولا يتشري هما دول الملايين
بدستور جديد رجعين هـ يتوضع يحمي أدميتنا ويحمينا وأحنا عايشين
ومنه هـ ننتخب زعيمنا ومجالسنا ياااه أحنا كنا فين من سنين
....
أستحلفك بالله يا أمي بدم شهداء ثورة يناير اللي بدمائهم سقوكِ
ومفكروش أن في يوم من الأيام يبعونا ولا يبعوكِ
ترفعي راسكِ للسماء بعزة وكرامة وكبرياء وتدوسي على اللي خانوكِ
....
آن الآوان أننا نتحد ونكون أيد واحده
مسلم مسيحي لابد نتحد نبني من تاني مجدكِ
اللي بـ أيادي الظلم دفنوه
ومعاه أحنا كمان إندفنا تحت أرضكِ
وبأمر أسيادهم الأمريكان حرفو تاريخ عظماءك ورجالكِ
كان ناقص يا أمي ينسو كمان إيه هو أسمك
أحمد عرابي . مصطفى كامل . محمد فريد . سعد زغلول .
لعبد الناصر والسادات هما دول تاريخك
هما دول زعماءك الشرفاء اللي وضعو أرواحهم جوه كفك
....
كانو فكرين يا أمي لما طال ظلمهم أن لتاريخ أبطالك هـ ينسونا
وأن حرب أكتوبر بطلها كان طيار وبطيارته كان عبورك يا مصر وانتصارنا
الله يرحمك يا سادات قدمت أخوك شهيد وده أول طيار من شهداءنا
في يوم السبت السادس من أكتوبر الساعة الثانية ظهراً كان أملنا
نعبر قنالك ونحطم خط برليف وعلى الضفة نرفع علمنا
وتحقق الحلم وعبرنا الهزيمة وأتكتب من تاني تاريخنا
وأرض سيناء تشهد لأولادك وأبطالنا
تاريخك يا أمي منقوش بالذهب أهو قدام ولادك ومحفور في قلوبنا
....
بوعدك يا أمي يا مصر من هنا
من التحرير ومن مسجد القائد إبراهيم ومن ميدان الأربعين
أني بمجدكِ أرفع أسمك وبأيدي أرجع أبني تاني أقتصادك من جديد
بوعدكِ مش هـ اختار لمجالسك النيابيه اللي بيبوس الأيادي
واللي بيوانس اللي يضربنا بالصواعق والعربيات الحديد
بوعدك أني ما أصوتش في انتخابات الرئاسة
للي بيوطي وبيطاطي زي العبيد
كفاية زل ومهانه للي ما يسواش كفاية كده خلاص
أتعلمنا نرفع الرآس ونقول للخاين أرحل بعيد
زي ما أتقالت للمخلوع مبارك ونظامه أحنا خلاص بقينا في عهد مصر المجيد
مش هـ تغمض عيوننا يا أمي كفاية نوم شبعنا مسكنات
وترضيات ما تذكرش في منح العيد
خلاص تعبنا من كلامك يا بطرس أن مافيش ميزانية وأنت سارق الملايين
وهربت قبل ما تلبس الأساور الحديد
....
بوعدك أحميكِ يا أمي من أي خاين يحاول يسرقك مني أو يبيعكِ تاني
بوعدك ولو خالفت الوعد مش هـ أشتكي ولا أقولك يا معذباني
بوعدكِ ولو خالفت الوعد أبقي من أرضك أحرميني
بوعدكِ لو خلفت الوعد أبقى ما أستحقش ساعتها أن في ترابك تدفنيني
بوعدك ولو خلفت الوعد أبقي يا أمي ساعتها أحرقيني
وفي هواكِ طيري عظمي وبعتريني
...
بس في عندي كلمة أخيرة
نصيحة نقولها للي على كرسيكِ جاي من جديد لينا
أنتَ مش هـ تقدر تكتم أصواتنا أو في يوم من الأيام تشترينا
....
وأفتكر أن في ليمان طره عبره للي خانو أمي مصر
وخانو شعبها وباعو أرضنا وباعونا
وأفتكرو أن مصر عزبة أبوهم أو عزبه من غير صحاب
يورسوها ويوراسوها و لولادهم سبوها وأحنا فيها خدامين بيـعَبِدونا
وكأنها مملكة عن أجدادهم ورسوها وورسونا
هي دي النصيحة اللي باقولها للي جاي على كراسيكِ يا مصر يا أمي يحكمونا
بقلمي
في حب مصـر
خالد العطار
